حمدِ باری تعالیٰ : بیانِ حمد و ثنا لا الہٰ الا اللہ

حمدِ باری تعالیٰ : بیانِ حمد و ثنا لا الہٰ الا اللہ

دلیلِ ذاتِ خدا لا الہٰ الا اللہ
بیانِ حمد و ثنا لا الہٰ الا اللہ

پیامِ رشد و ہُدیٰ لا الہٰ الا اللہ
وظیفہ ہائے مَلا لا الہٰ الا اللہ

مدارِ جملہ عُلا لا الہٰ الا اللہ
نگارِ ارض و سما لا الہٰ الا اللہ

کتابِ عشق و وفا لا الہٰ الا اللہ
نصابِ صبر و رضا لا الہٰ الا اللہ

دھڑکتے دل کی صدا لا الہٰ الا اللہ
مچلتے لب کی ندا لا الہٰ الا اللہ

دلیلِ قاطعِ کفر و ضلالت و اشراک
ربوبیت کی بِنا لا الہٰ الا اللہ

دلیلِ فکر و نظر ، انتخابِ کلمۂ دیں
یقینِ حرف و نوا لا الہٰ الا اللہ

ہر ایک ذکر سے افضل ہر ایک ورد کی جاں
دلیلِ صدق و صفا لا الہٰ الا اللہ

ہر اک مرض کی ہے اکسیر یہ کلامِ حسیں
پڑھو جو چاہو شفا لا الہٰ الا اللہ

ہر ایک رنج و الم کے لیے حصارِ قوی
مُزیلِ کرب و بلا لا الہٰ الا اللہ

سکونِ قلب کی خاطر ہے نسخۂ شافی
مریضِ غم کی دوا لا الہٰ الا اللہ

نشانِ منزلِ مقصود ہے یہی احمدؔ
زباں پہ رکھّو سدا لا الہٰ الا اللہ

(حمدِ باری تعالیٰ : بیانِ حمد و ثنا لا الہٰ الا اللہ)

از :طفیل احمد مصباحی

پروفیسر شاداب رضی بھاگل پوری : ایک عظیم ادبی شخصیت

اردو میں تضمین نگاری کی روایت 

اسلام کا تہوار بڑا عید کا دن ہے