حمدِ باریِ تعالیٰ جل جلالہٗ و عمَّ نوالہٗ

روزِ جمعہ کی سعادت :

رواں ہے صبح و مسا لا الہٰ الا اللہ
ہے کائناتی صدا لا الہٰ الا اللہ

قرارِ قلبِ حزیں وِرد جس کا ٹھہرا ہے
دُکھی دلوں کی دوا لا الہٰ الا اللہ

اِسی کا ذکر ہر اک ذکر سے ہوا افضل
پسندِ ذاتِ خدا لا الہٰ الا اللہ

خدا نے رمزِ حقیقت نہاں کیا اِس میں
نشانِ رازِ بقا لا الہٰ الا اللہ

دُرود و حمد و ثنا نعت بر سرِ میزاں
مٹائے ساری خطا لا الہٰ الا اللہ

سکوں کی سانس اِسی سے نصیب ہوتی ہے
ہر اک مَرَض کی شفا لا الہٰ الا اللہ

اُجالتا ہے یہی شیشۂ رگِ ہستی
ہے قلب و جاں کی ضیا لا الہٰ الا اللہ

بہار زار بناتا ہے یہ خزاں کو بھی
نسیمِ صبحِ عطا لا الہٰ الا اللہ

مصیبتوں میں مشاہد کے کام آتا ہے
ہے رحمتوں کی ردا لا الہٰ الا اللہ

حمدِ باریِ تعالیٰ جل جلالہٗ و عمَّ نوالہٗ

عرض نمودہ : محمد حسین مشاہد رضوی
14 جولائی 2023ء بروز جمعہ

شاہِ کوثر بن کے امت کے نگہباں آئے ہیں

نظر نظر کو وہ جلوے ہزار دیتا ہے

اُن کی جس دم گفتگو ہونے لگی