یہی عشق ہے جی کھپا جانتا ہے

یہی عشق ہے جی کھپا جانتا ہے
کہ جاناں سے بھی جی ملا جانتا ہے

بدی میں بھی کچھ خوبی ہووے گی تب تو
برا کرنے کو وہ بھلا جانتا ہے

مرا شعر اچھا بھی دانستہ ضد سے
کسو اور ہی کا کہا جانتا ہے

زمانے کے اکثر ستم گار دیکھے
وہی خوب طرز جفا جانتا ہے

نہیں جانتا حرف خط کیا ہیں لکھے
لکھے کو ہمارے مٹا جانتا ہے

نہ جانے جو بیگانہ تو بات پوچھے
سو مغرور کب آشنا جانتا ہے

نہیں اتحاد تن و جاں سے واقف
ہمیں یار سے جو جدا جانتا ہے

(یہی عشق ہے جی کھپا جانتا ہے)
(کہ جاناں سے بھی جی ملا جانتا ہے)

میر تقی میر

ہم خاک کے آسودوں کو آرام نہ آیا

کیا دیجیے جواب اجل کے پیام کا

اردو میں تضمین نگاری کی روایت